張敬軒紅館開演唱會 邊唱邊教防疫

受疫情影響，演唱會全面停擺，延期一年、萬眾期待的張敬軒演唱會終於本週日（22日）開鑼！軒仔成功以首位重返紅館開騷的歌手身份，舉行八場《 張敬軒X 香港中樂團盛樂》演唱會，紅館因應疫情措施，只容許一半觀眾入座，為了令6,000歌迷及約80位演出者安心，大會除了做足防疫措施，軒仔亦化身紅館職員拍片親身教防疫，連歌迷如廁時間如何洗手都照顧周到，教埋大家唱洗手歌，引得觀眾連場爆笑！

相隔一年，成為首位率先重踏紅館舞台的歌手，軒仔身穿黑色雲石皮褸及羽毛帽隆重登場，以經典歌曲〈 酷愛〉作演唱會序曲，向着紅館觀眾大叫： 紅館我番喇！大家都番喇！引得全場拍手叫囂，但見全場有一半座位被收起，他又笑着説：  如果比着以前我升上台見到入座率咁樣，一定好唔開心，但依家見到，我好感動，感激大家支持！因為要配合政府防疫規限，所以大家坐得比較疏落，系咪輕鬆好多？哈哈！只要你哋肯，我就肯唱，唱幾多場都冇問題，呢個騷真系得來不易！ 

期間軒仔發現有歌迷一直高舉巨型麪包公仔想送他時，他笑道： 你27號會唔會再？我叫姐姐（家傭）坐你附近！不過我今次唔可以收禮物，你哋唔使送畀我。

今次演唱會共有四個章節，而每一節開頭都會有一首序曲，是軒仔與中樂團一起揀選的。在第二章節中，有四名戴上口罩的dancers上台伴舞，軒仔笑謂：原定安排咗超過20位dancers，不過因為疫情關係減到得番4個，為免人多會喺台上交換飛沫，所以舞蹈員都會戴上口罩。軒仔又謂要屈就80名樂手一齊坐，並表示自己及需要用口吹奏樂器的樂手事前都有做深喉測試，確定沒受感染才開騷。之後他唱〈悔〉時，表示感受很深： 2007年當時唱都冇乜感受，有啲歌年少無知時唱，都系置身事外，到人長大咗，再唱先覺得首歌系講緊自己，彩排時我真系邊唱邊哭咗。然後他又特別多謝老闆楊受成：畀我空間做音樂，每個演唱會都精益求精，多謝你對我慨信任。

疫情下開騷，軒仔特別為大家帶來意外驚喜，貼心準備了一把拉尺度社交距離，軒仔笑謂： 我應該系史上第一位帶備拉尺喺紅館開騷慨歌手。 全場爆笑！

演唱會尾聲encore環節，軒仔即席宣佈好消息：我加入英皇娛樂公司7年，公司上下、老闆、高層都對我十分支持愛護，喺楊博士支持下，我今年終於成立自己慨唱片品牌，希望大家支持新Label發行慨唱片！軒仔更為前來捧場的壽星女蔡卓妍改編歌詞，將〈櫻花樹下〉第一句歌詞改成樹蔭有一隻蔡卓妍，跌落你身邊，凼得阿Sa勁開心！

老闆楊受成夫婦、阿Sa及Kenny齊往捧場，當台上的軒仔祝賀阿Sa生日快樂時，座上的壽星女開心到大擺心心pose！