70歲劉松仁中風近況曝光 米雪送暖看望
現年71歲的劉松仁，去年底傳出中風消息，更被拍到撐住枴杖由太太攙扶陪同到健康中心做物理治療，不過鬆哥就表示自己只是在做舞台劇期間跌傷；出事一年多，鬆哥康復進度雖然較慢，仍要撐枴杖走路，但精神飽滿，現時亦不用別人攙扶步行。
入行四十九年的劉松仁，拍過不下數十部受歡迎劇集，15年在無線拍完最後一個劇《華麗轉身》，鬆哥便轉攻內地，去年更為舞台劇《利瑪竇》擔任創作及導演，由彩排到公演都落力監場，事事親力親為。不過自去年四月完成舞台劇後，去年底傳出他中風消息，指他身體欠佳行動不便，甚至説話不清。日前，與他相識超過四十年的好友米雪，專登駕車到他位於何文田的寓所送上健康食品慰問，鬆哥撐着枴杖與米雪企街吹水精神奕奕，期間米雪更即席示範教鬆哥做伸展運動，對老友健康狀況非常上心，原來米雪連月來一有時間便會陪鬆哥練氣功、行山及約三五知己陪鬆哥飲茶，以行動鼓勵鬆哥加油！有好友支持送暖，是鬆哥最佳治療良藥，希望鬆哥早日康復，回勇再現熒幕同觀眾見面。
今年一月《利瑪竇》公演Part2，鬆哥終於現身，雖然身體狀態已不如前，全程要撐枴杖慢行，上落亦要人在旁攙扶，不過身體比以前消瘦的他，看落精神不錯，之後鬆哥又被傳媒拍到由太太陪同到健康中心做物理治療，對於身體出狀況，鬆哥只表示是不小心跌傷。雖然身體出問題，不過鬆哥一直正面面對病情，聽從醫生指示好積極做治療及運動鍛鍊。據知情者透露：自從出事之後，鬆哥右腳同右手都冇乜力，要撐枴杖先行到，朋友介紹咗幾個專科聖手畀佢，一路跟進渠慨情況，醫生都同鬆哥講，治療過程可能會較漫長，康復進度亦好視乎渠意志同努力，最緊要繫有信心勤力做運動唔好偷懶，鬆哥好積極，堅持每日都做運動，又會專登由屋企行大段路落旺角，雖然行得慢，但鬆哥唔怕辛苦好有正能量，所以情況進展得唔錯！
同鬆哥相識超過四十年的米雪，本身和鬆哥非常老友，得知鬆哥身體抱恙，米雪不單緊張介紹中西醫給鬆哥接受治療，又不時陪鬆哥做氣功、行山鍛鍊體魄。據知情者透露：米雪同鬆哥識咗幾十年，咁多年來一路keep住聯絡，近年渠哋為咗強身，仲會約埋一齊練氣功，幾年前鬆哥認識一位內地高人，相信觸感治療，渠都有介紹米雪去試，知道鬆哥依家要多啲做運動治療，米雪就鼓勵鬆哥去行山，行山除咗可以有一定運動量，喺山裏行亦令人心曠神怡特別舒服，行完個人都醒神啲。怕鬆哥會悶，米雪仲不時約埋以前一班老友出嚟陪鬆哥飲茶飯敍，喺呢個時候，有朋友開解同鼓勵，對鬆哥嚟講會特別有能量，心情愉快做咩都會順啲！
日前，米雪專登駕車載同一名女友人，到鬆哥位於何文田的寓所探他兼送健康食品。當日身穿深灰色外套，戴口罩、太陽眼鏡現身的鬆哥，將手機用吊繩掛在頸，一個人撐着枴杖步出寓所，索性同米雪企在寓所外傾偈聊天，雖然撐住枴杖，鬆哥看來非常精神説話亦好有中氣，三人説到興起，期間鬆哥又攞手機分享相片給米雪看，米雪又教鬆哥做伸展運動，鬆哥跟着好友指示伸展左手，傾了近一小時，米雪同鬆哥話別，自己駕車離開，鬆哥則撐住枴杖慢行返住所。翌日早上約十時許，鬆哥好勤力又一個人出動鍛鍊，今次則在寓所樓下的停車場做保健操，因為疫情關係，鬆哥近期較少外出，現時每日會在停車場散步及做保健操強身，只見他將手向前伸展之後又往後伸，如是者做了幾十下，由於右腳彎曲能力不太好，見他亦微彎雙腳之後企起身，借運動鍛鍊腳力，做了大半小時才行返上樓。充滿正能量的鬆哥，相信復原指日可待。
