馬國明湯洛雯明年結婚 未來岳父贈豪宅入住

湯馬戀公開半年，46歲馬國明與33歲湯洛雯全天候甜蜜曬愛放閃，馬明唔止有家唔想返，長駐靚湯紅磡屋企，仲講明以結婚為終極目標，派定心丸畀靚湯，馬國明湯洛雯戀愛大過天，疫情期間照樣拍拖，早前更被影到齊齊研究淺水灣豪宅，似是為未來結婚打算﹗ 今日有報導指馬明和靚湯趕在下年拉埋天窗，更會以未來岳父湯鎮宗送的別墅做新婚愛巢﹗

馬國明、湯洛雯愛得高調又甜蜜，二人一早表明以結婚為大前提，而靚湯早前放聲氣指唔會閃婚，因為婚前亦要先買樓，而馬明亦明言會努力賺錢。今日有報導指馬國明順利過了靚湯父母嗰關，婚期為明年初，更指去年湯父湯鎮宗以靚湯之名購4,581萬元的馬鞍山雲海別墅中的Lily Avenue逾2,000呎別墅單位，本來打算湯家四口搬去住，不過現在湯鎮宗順利成章送給女兒當嫁粧。更有指馬國明和湯洛雯已向公司彙報婚事，而TVB亦為二人找來婚禮讚助，可喜可賀﹗

早前馬明與靚湯一直被懷疑已婚及即將會閃婚，搞到二人要連番澄清，靚湯出席公開活動時強調堅拒閃婚，她説：我們都是有計劃的人，之前受訪話不排除會閃婚都是講笑，結婚要計劃好多，起碼父母要知道，又要買樓，暫時我們想儲錢，當初拍拖都講過以結婚為前提，都幾多歲啦，不會玩了。現在父母肯定是知道了，雙方都非常接納，成為一家人指日可待。

馬明與靚湯愛得坦蕩蕩，拍拖唔夠一年已承認曾商討婚姻大事，二人見過雙方家長，關係穩定有共同目標，看來好事不遠，據知情者透露：馬明就快50歲喇，唔結等幾時，難得靚湯都對渠死心塌地，仲話結婚生仔系下一步，唔好夜長夢多喇！渠哋都想疫情後先大搞，有計劃出年成事！靚湯有家底，渠爸爸湯鎮宗亦手持過億物業，但靚湯想婚後同馬明有屬於自己慨安樂窩，最近渠哋都睇緊樓，揀定心水地區，等個市稍為回落就去馬，錢嗰方面都唔大問題，靚湯屋企大把，馬明亦揾到。

圈中不少情侶成家立室後，都搬去港島區名校網，方便日後子女返學，好像陳豪陳茵媺一家，由大埔比華利山別墅搬去港島南灣豪宅，不過住開九龍區的靚湯竟為了未來奶奶與老爺，有意在港島區築愛巢。

自小在馬鞍山長大的靚湯，近年搬到紅磡住，她深知馬明與家人同住在太古城多年，再加上馬明侍母至孝，不想婚後離家太遠，所以她亦作出讓步，知情者説：靚湯同馬明有曬共識，知道渠住開港島唔想離屋企太遠，得閒可以成日返去探兩老，所以最近特別留意港島區啲樓。早前本刊見靚湯路過地產鋪亦駐足研究淺水灣一帶的樓盤，現場所見， 她對住全部億億聲的賣盤單位，不停手指指意見多多，馬明就細心聆聽間中迴應一兩句，看來靚湯對淺水灣的豪宅頗有興趣，不過馬明睇到個銀碼個心應該怯一怯。未來老婆想住淺水灣，馬明要再加把勁喇！